Iṭij n ṣṣmayem isserɣ akk tamurt ; anda tebɣuḍ tserseḍ tiṭ-ik d tewreɣ ara k-id-yemmagren, grant-d kan kra n tselnin smektayent-d tizzegzewt, maca, ula d nunti ur tettdum ara fell-asent tefsut ; akka kra n wussan ad ten-taweḍ tqabact n leqḍiɛ. Mḥend, ittmuqul deg-sent, ibedd nnig wexxam aqdim, lfeṛca n uqermud tettnal-it-id ɣer tayett, islufuy s tmuɣli i yemɣaḍen, tisselnin-inna yetḥencen s iɣzer yuli-tent akk asmi tella teysawt d tilni i sennin azrar n wussan-is. Irfed allen-is s Aqacur-n-Wewrir, mazal-it akken, abucic icberber fell-as. Crurdent-d wallen-is ; ɣer Tala-meṛma, i weksar d Imekrez ittmuqul igran Unagu, ma yella wacu ibeddlen. Tlatin d aseggas ur yerkkiḍ tamurt n baba-s. Zik akal-agi amzun akken yektal-it s idikel-ines, yessen-it tardast tardast.