Tamurt tessewḥac, tagut, asemmiḍ. Lbaṭel yuɣ akk timnaḍin, teqqime-d talwit di kra idurar deg-i ckentḍent tuddar, n wid i rewwlen ɣef umennuɣ. Rewwlen, bɣan ad ḥarben ɣef ciṭṭ-nni iniɣman s zzit… d wid-nni kan i d-yeqqimen fessusit ɣef tuɣmest-nni yettagin tiram, ma ttmaččant s zhir n lfuci d ussemsed ijenwiyen. Lmut tuɣal d tiremt n yal ass, tessedhuy iles, turar di trebbuyaɛ, tessemlalay di tejmaɛt, lmut tuɣal d tinifift yesseblaɛen akud ; win yebɣan ad isɛeddi ass-is, neɣ ad d-yawi uḍan-is, ad imeslay ɣef wayen d-yeḍran ass-a di Taxuxt neɣ di Bu neɛman neɣ di Ɛin-defla … tkemleḍ akkin ; ɣer wanda mazal amdan d aweɣezniw n tmacahutt qqaren-as : Tudert ger Izzayriyen.

Iṭij n ṣṣmayem isserɣ akk tamurt ; anda tebɣuḍ tserseḍ tiṭ-ik d tewreɣ ara k-id-yemmagren, grant-d kan kra n tselnin smektayent-d tizzegzewt, maca, ula d nunti ur tettdum ara fell-asent tefsut ; akka kra n wussan ad ten-taweḍ tqabact n leqḍiɛ. Mḥend, ittmuqul deg-sent, ibedd nnig wexxam aqdim, lfeṛca n uqermud tettnal-it-id ɣer tayett, islufuy s tmuɣli i yemɣaḍen, tisselnin-inna yetḥencen s iɣzer yuli-tent akk asmi tella teysawt d tilni i sennin azrar n wussan-is. Irfed allen-is s Aqacur-n-Wewrir, mazal-it akken, abucic icberber fell-as. Crurdent-d wallen-is ; ɣer Tala-meṛma, i weksar d Imekrez ittmuqul igran Unagu, ma yella wacu ibeddlen. Tlatin d aseggas ur yerkkiḍ tamurt n baba-s. Zik akal-agi amzun akken yektal-it s idikel-ines, yessen-it tardast tardast.

Issers aqerru-yis ger iḍaren-is, yettargu « finat » izzaεfen fell-as ass-agi. Tugi ad teddu yid-es ɣer lexla akken ad d-nadin leâcuc n yifrax. Tenna-yas-ed keč d assemaṭ, tesneḍ ḥala zhu akk d icalan, acema ur t-tessarameḍ di ddunit-agi, ur lemmer mačči d imawlan-ik I k-ed-yettakken taqedduḥt n seksu yal tasebḥit tili atan ičča-k laẓ akk d umenṭar deg iguduyen; yerna ula d agudu tettɣanfuṭ, as-tiniḍ keč mačči d aqjun.imekta-d, am yal tikkelt iεeddan, asmi-akken I tt-id-wwin lǧiran d tajḍiṭ tettargigi di texxamt tamectuḥt I s-xedmen, tetewḥec yemma-s in-teǧa di tmurt-is qbel ad teṛwi ayefk-is. Yussa ɣer ɣur-es s teḍṣa, ikkes-as lxiq, ifka-yas lkuraj. S yin uɣalen d irfiqen ur nettemfaraq ula deg-iḍ, imla-yas yark ixxamen n taddart i dgi tettili lmakla yelhan, anwa I gesnen ad yessebw, melmi ṭṭeggiṛen Iɣsan, melmi ṭṭeggiṛen abbuyun. Imla-yas yark tiḥnacin I dgi-yezmer weqjun ad yesseḥmu I yiṭij mebla ma ẓran-t warrac n taddart. Diɣen,iḥka-yas-ed ɣef tmacahutt imawlan-is, anwa seg-sen yeḥninen anwa isεan ul qessiḥen, d wamek sεan lqima deg uxxam akken ad teddu ddaw leεnaya n win ttaggaden at wexxam akk d win itnefcicen. Acku iqjan ttwaḥeqren aṭas.