Litiddyu, chronique d'un étudiant kabyle en kabyle.

Par zimu : 11 oct. 2009 à 22:43 - TIRA

---

Baba-s n Litiddyu, netta a yettmeslay ɣef baba-s, ad sen-iqqar : « asmi yella baba, ad s-yeɛfu Ṛebbi, yiwen ur yezmir ara ad d-yesɛeddi awal nnig-es, izmer-asent akk, iqqar lemutul, isefra, issen taqbaylit, mara i iheddeṛ amer tettafeḍ ur yesussum ara … »

Litiddyu, netta, ihwa-yas lḥal dayen kan imi yesla i baba-s iheddeṛ akka ɣef jeddi-s. Issewweq leɛqel-is, yebda yettimajini-d amek akken yella jeddi-s di zman-is, zman n yiɣil. Yesla akka ar medden wid yeqqaren belli jeddi-s yella d bab n wawal. Lllan kra imeslayen di taddart mara ten-id-inin medden zdat-es, qqaren-as « am wakken yeqqar jeddi-k ». Litiddyu, ad iqqim kan ad yesussem ala, ad yeǧ baba-s ad yemmeslay ɣef yiman-is, netta amek ara yexdem, Litiddyu aggeswaḥ, immeɣ yebra-d i wawal-agi :
« Teẓriḍ a baba, jeddi, am wakken i s-yenna umusnaw-nneɣ Dda Lmulud, yella yiwen yella ulac-it, yella yiwen ulac-it yella … » Weqbel akk ad d-ikkemmel Litiddyu ameslay-is, yegzem-as awal baba-s s usuɣu : « amek akka yella yella ulac-it ulac-it yella yella !? Meqreḍ tura a ssimra-k, tixeṛ-ik i imeslayen-agi i iɛewjen akka am keč a neggḥ-ik … »
Idewweṛ baba-s ar leɛmum-is d wid yellan din, akken ad ten-id-yeg d inagan, ikkemmel awal-is : « yumayen-agi i iɛeddan, teẓram acu i wumi d-iserreḥ, ula d setti-s yerra-t d timekreḍt d tavuluṛt… ».

Litiddyu, inṭṭeq-d igzem-as awal i baba-s inna-yas : « ala a baba nniɣ-ak ass-nni, setti d timkerḍit sitadir d la bibliothèque … » Yuɣal-ed baba-s igzem-as daɣen ula d netta awal inna-yas :
« Beṛka-k smaṭa, asmi lliɣ annec-ik uɣeɣ-as-d tayuga i baba, keč mazal-ik ad tsetteḍ dagi di ṛas lmal, deg wasmi akka dɣa i tkecmeḍ ar linvirsiti-yagi ara k-yeččen, yuɣal yekreḍ akk lmux-ik s daxel, teɛreq-ak ula d taqbaylit … »

⇑ haut ⇑