Aqjun

Par admin : 11 oct. 2009 à 22:04 - Tullizin

---

Iwweḍ-ed imiren bab-is seg ɣerbaz s axxam; yufa-t-id yeɣreq di tirga-ines. Issawel-as ur d-irfid aqerru-yis am win yagzen, iwwet abrid iεedda akken ad d-issew lqahwa. Aqjun mazal-it yettmekti-d amek itezzin netta d finat I yiqjan nniḍen ma bɣun ad d-kecmen tamnaṭ-nsen mebla sseba u mbla ma wwin-ed ttriḥ ɣur-sen. Yiwen a t-id-yeṭṭef si traṭiwt wayeḍ si temggaṛṭ, ur s-ttariḥen-ara alama yenna-d caεfeɣ wa ad d-yeggel ɣef tlata tqejjaṛin belli ur yettuyal-ara a t-id-tefk tsemmit yeɣlin deg umnaṛ n tezniqt-nsen. Ma d nitni ttawḍen s anda I d asen-yehwa di taddart imi ulac anwa I sen-izemren di sin, yernu iqjan n taddart ur newwiḍ ara leḥsab n εecrin ḍaεfit ur zmiren-ara I wmennuɣ n sin. Ticki cwiṭ iwweḍ-ed umɣar n wexxam, yufa-t-id di liḥala-nni utɣebben, yuẓa ar ɣur-es, isself-as. Isteqsa-t ɣef acu i t-yuɣen ur s-ed-yerra-yara ; ifaq belli ass-a ur yemsefham-ara netta d finat ɣef lḥaǧa neɣ ɣef tayeḍ. ḥḥala amɣar n wexxam Ig-ẓran d acu n lǧehd tesεa finat fell-as, amek I tezmer ad t-id-tesru ɣas ma neẓra iqjan ur ttrun-ara; ḥala netta ig-fehmen tamsalt, yettḥalfu-yas ma yettɣebben. ma akken, si zdaxel n texxamt-is, ad d-zher fell-as akken ur yetteεraḍ-ara ad yekcem. Yal tikkelt yettawit yides ɣer lexla, yettaɣ-as-ed snat tfarmaǧin akken a tent-yečč. Imiren ad yaεreḍ ad yekkes fell-as lxiq s lehḍur akk d tmucuha; aṭas I s-yeqqaṛen belli d aqjun i s-itekksen ccuq. Nutni garasen ẓran tidett anda teffer, anwa i d arfiq n wayeḍ, is-yettawin lḥif d ineẓma i wayeḍ. ḥḥala amɣar bu meyya tlufa I t-yesrusun di leḥsab-is, ifaq-as si tmuɣli tamezwarut belli yettw-et s tmuɣli n finat akk s useglef-ines igan am tidak n wuccayen mara yili wass n tziri.

Iḍ n tziri tessawal-as-ed akken ad azlen ger tferkiwin n taddart , d anadi ɣef iwetlan akk d wuccanen. ɣas ma netta ur yeḥmil-ara iwetlan imi ttneggizen anda ufan ur ssinen ula d abrid, keččmen di ẓrub akk d yesɣaren isεan iqecḍan igan am lemwwas; ur ssinen-ara d acu I d zhu, wala d acu I d aqeṣṣar. Ma d uccanen yettagad-iten.

Iffeɣ-ed weqcic seg uxxam, aεebbuḍ yeččur d lqehwa akk d lgaṭu. Iddem-ed taqlaṭ. Iqqen-as-ett i temgaṛṭ. ɣas ma di tilawt aqjun yettaɣ-as awal am uḍaḍ-is, s anda I d as-yehwa a t-yerr. Maca deg-isura arrac ẓẓuɣuren iqjan.ixxeddem am nutni ɣas ma yella netta iteddu-yas di lebɣi am yemma-s. ma yenna-yas bdded ɣef tṛaṭiwt a t-yexdem imi yeẓra acu i t-ittṛaǧun ma yugi ad yexdem ayen yebɣa. acḥal d abrid i d-yeddem ɣures aεekkas iṭṭef-as-t almi yettfuḥu. Yewwas, igi yugi ad yeddu yides, iεelleq-it ɣer teslent, qrib I d-yedda lqeḍ-is. seg-ass-en yuɣal yecεef as-yeṛẓ awal-is, ɣas ma yeẓṛa-t ixuṣ di lefhama am arrac irkelli ur nessin d acu I d leḥnana ɣef twacult n widak illeḥun ɣef rebεa iḍaren; ɣur-sen accema ur yesεa azal ḥala taṛwiḥt-nsen, as-tiniḍ taneffuṭ-nsen ttawin-tt di lǧib ,melmi I sen-d-tenfaḥ a tt-zzun s aẓṛu n lqseḥ. Tura yessen yark tikli n weqcic ɣas ma tufɣa yides tif-itt tissit n qeḍṛan s cciḥ; iḥemmel zzux ger imeddukkal-is belli aqjun-is yewεar , lexṣas n tirugza deg-s irennu-yas-ett weqjun-is. S yes ig-isefqay wiyaḍ, isserkay-it fell-asen ɣas ma di tilawt iɣuc ad yezher ula ɣef tweṭṭuft. Tamezwarut yettaggad am netta am yeqjan ur nezmir-ara, tisnat ur yesεa ɣef acu ara-yeḥgged ɣef wiyaḍ, medden marra ḥemmlen-t, ttakken-as ad yečč mebla ma yessuter-it. Aneggaru deg-sen ulac d acu I s-yexdem n lbaṭel seg-asmi i d-illul ar tura. Aqjun illeḥun ɣer tama n weqcic yettḥenic ɣur-es si tagdi d εeggu. Imi yeẓṛa ma yezwar-it aṭas as-yefk arkell si deffir, ma yegṛa a t-iddeqem s teqlaṭ arma yekker uksum-is di temgaṛṭ. Iteddu yides I wudem Ṛṛebbi, ɣas yeẓṛa ḥala facil n wallaɣ ad d-yawi si tdukkli tamcumt; siwa lhem ara-d-yemlil netta d weqcic. Anda tella tuzligt a t-yawi ar ɣur-es, yernu d netta ara-yezwer ɣer zdat , imi tasa n weqcic d tin n čičču; iḥqeṛ aqjun, aqjun iḥqeṛ lɣaci, lɣaci ḥemlen-t ma yili ur d-yedda-yera netta d weqcic. Yeɣli wass, yers-ed ṭlam,iṭij yekcem s axxam-is; aqjun deffir weqcic icuban aqjun uɣalen-d s axxam umbaεd mi ddewṛen I tiɣilt akk d weltma-s. deg ubrid s axxam wallan “finat” teqqim am tislit di lawan uṣeddaṛ tettqeṣiṛ d yiwen n weqjun igan am lweḥc s ccar igan am leḥrir, tuɣmas am ijenwiyen, ttarent-ed tafat n tziri. Iccarew, rgagin iḍaren-is, ur yumin-ara I ttwalint wallen-is armi I d-tareḍqent d imeṭṭawen. Qimen akken am sin yefrax ur yettḥaz ubeḥri; wa itezzi I wayeḍ, wa yesraḥay wayeḍ. Imi iqjan teẓram s wanzaren I ttqisin am leqbayel zaεma! Finat s wecmumeḥ d tnefcic tesrusuy allen-is ɣer teqqatt, ma d aqjun-nniḍen iččufu deg iman-is am tyembult n lεid. Iwweḍ ɣur-sen, iruḥ as-yehḍeṛ I finat teḍṣa-yas-ed. Testeqsat-id ɣef anda Ig-dda ass-a, tebɣa as-ed- zziken “dik”, aqjun I d-wwin lǧiran si “lalman” neɣ ma si “libya”. Tenna-yas-ed ɣas ma mazal I yessen taqbaylit akken ilha yebda a yfehhem d acu unamek n yal aseglef n teqbaylit. Tenna-yas issen aṭas n tmucuha ɣef uccanen akk d yefrax, u netta s yiman ig-ḥekkmen yiwet n tejlibt n lmal yugaren yark tijlibin n taddart marra mara ddukklent. Tarra tmara ikker weqjun isṛaḥ dik, yufa deg-s rriḥa n lmaẓuṭ akk d iriran. Izzi-d, Ibɣa as-yehḍer I finat. Acu kan uqbel as-yini yiwen wawal tuzzel ger ẓrub n tebḥirt, dik deffir-es yesseglaf s lqedd ugerjum-is. Cwiṭ akka yewweḍ-ed weqcic s wudem ucengu, immeɣ ɣef weqjun-is s uḥaref akk d zεaf. Iddem iqqen-as tamrart I tgarjujt-is. Izzuɣer-it netta yettwali s leḥzen aggemaḍ sin lexyalt yetturaren ger tebḥirin ur nesεi ṣṣaba. Issaram imiren ad Iɣeẓ aqcic, s yin ad yernu Dik akk d finat I –t-yeǧǧan weḥdes ger leḥyuḍ n yilem. Akken wwḍen s axxam iqqen-it ɣer taṛust, aqcic ikcem s axxam. Iḍ kamel yettneẓma, yettuɣu s taɣect n llufan teǧǧa yemma-s. yiwen ur as-ed-isla. Yebɣa ad iruh ad d-iẓer finat ur d-nusa-yara ar ɣur-es akken tuɣ tanumi tettas-ed ɣur-es yal mara a t-qnen di lbaṭel. Yettmuqul deg udem uṭiṭuc I s-id-keččem si tsemit n lḥaṛa. Yal mara issel I lhaffa as-yini d nettat. Ittu Dik I yellan imiren iqqim yid-es, iḥekku-yas ɣef libya I d-yezggan di lalman anda akken armel d ttmar ugaren itran deg iḍ n tziri, anda akken izzan ɣelben aṛzen di tsiqest-nsen. Asglef-is yezzi am taɣect ccenun yemɣaren n taddart ma yemmet yiwen seg-sen, rqiq ikeččem si ẓuran n wul-is yeṭṭenṭṭunen am zzeng deg-geffur yal mara iḥes I wembbiwel di lḥaṛa. At wexxam yeṭṭsen taguni iḥeqqiyen ttun-t ur d-ruḥen-ara as-ed ḍelqen si rrebg-is. Taḍebsitt n weɣrum deg-uyefki,I s-ed-sersen zdat-es, ur tt-isuma-yara. iqqim iḍ kamel I laẓ, ur yečči-yara, ittmekti-d taqjunt-is. Yuli wass akken ttalin wussan si zik, acu kan netta ɣlint-ed wallen-is seg aεwaz, inɣa-t uxxemem ɣef ayɣer ur d-tusa-yara finat. Werǧin imeyyez ad yesεeddi iḍ mebla ma iwala-tt, yunnum tnefcic-is; d netta I tt-yettḥelilen ɣas ma teḍlem deg ayen ibanen; wama ayen ur ibanen-ara isqizib-as deg-s. Taṣebḥit, ma akken i d-kkren at wexxam ufan-t-id taṛaṭiwt ger iḍaṛen, ṭebbqent tibaṛditin-is am sin lelwaḥ yemyekcamen. Ittinẓi,yettkefkif, aldayen ɣellin-d si ger tuɣmas-is, as-tiniḍ yencef; iwweḍ-ed wemɣar issereḥ-as-ed si rrebg n lmeḥna; yenna-yas “ uɣaleɣ ula d nek a tettuɣ”. Akken I d-iḍleq ihmel ɣer lḥaṛa lǧiran s yiwet n tazla yettawin iffarawen n yemɣi n ṭumaṭic. Igzem abeḥri s tazla. Yewweḍ qbala ɣer texxamt n finat ad iẓer acu i tt-yuɣen. A tt-yesteqsi ayɣer ur d-truḥ-ara tammeddit n yiḍelli ar ɣur-es; ahat tuḍen neɣ ahaqel ula d nettat qnen-tt warraw n leḥram. Ur tt-qinen-ara; ur tuḍen-ara;ur tehlik-ara; ur tt-iqqis-ara waṛeẓ; acemma ur tt-yuɣ. Ass-nni iffeǧeǧ wudem-is am lemri, teḍṣa xir n zik-is. Dik bu tfekka n yizem, bu teglimt n leḥrir iẓẓel ar tama-s am uqcic amecṭuḥ. Ttbanen-d di sin am yemɣiden umbaεd ixeddim, ṣefḍen tidi-nsen s tɣimit wa ɣer wayeḍ, wa di lbaḍna n wayeḍ. Akken yewweḍ, issellem fell-asen s useglef n nnig tuɣmas, yugem-ed, si targa n leḥzen, iqceṛ n lkuraj i s-yesteqsa finat ɣef ayen I tt-yeǧǧan ur d-ruḥ-ara laεca-nni. Terra-yas-ed qbala, udem s anzaren: a niɣ tuɣeḍ-iyi ! isla-yas-ed i tririt-is seg umruj I dgi-yeɣreq; ma akken yettmuqul taḍsa ustehzi n Dik yellan issened ɣef tqejjirt n finat. Iqqim din ; iqqim s waddud am yiwen zdat n lmut-is yettraǧu am akken yella kra ara-yeḍṛun yid-es; acemma ur d-inunta; ur yeḥzin ula d leḥzen, ineẓd ur yemwwawel deg-s, yeqqim yettraǧu d acu ig-zemren ad yeḍṛu. Inna-yas belli bɣiɣ am heḍreɣ; Terra-yas-ed “d acu ad iyi-d-iniḍ”;” nek, d taqjunt! Akken di yehwa ad xedmeɣ”. Terna-d s umbbaẓẓel “ ula d nek bɣiɣ lehna, ttxil-ek effk-iyi-tt. Ma ihda-k-id Rebbi, ttu timucuha n leḥnana akk n tisselbi ; yak teẓriḍ, tudert d aṭas d cwiṭ”. Ibɣa as-yerr lehdur, ikcem-ed Dik ger-asen am win isεan aseglef netta d Finat. Yuɣal, akken iwala tiḥeṛci n Dik, iddem-ed iẓẓel ɣer tama n teqjunt yellan tettmuqul deg-accaren-is.yebda a ihedder I yiman-is: ɣas d iqjan nesεa lḥaṛma, aggur ula d nekkni nettwali-t, nessen adrar, nessen aẓaɣar; aqjun ma yettwet imeččeḥ idamen-is, ɣas ma yella ṛẓag-it; akken ula d nesma ubeḥri tessen cqayaq I tettεeddi, ad taweḍ ɣer wanzaren n win I tt-yuklalen. Ihi assa d ass usenduq! Rebbi yeṛḥem tiẓeṭ ukesser. Issegra-yas-ed” ihi, tura nek yidem d ayen”. Terra-yas-ed”ih, d ayen!”. Deg ubrid s axxam iḥulfa weqjun s tefses n yedmaren-is akk d weqṛaḥ n weεrur. Yuɣal-ed ṭlam ger wallen-is; iwala temẓi n taddart d wacu I tḥud tegnawt n tjur d ẓẓuṛ. Dɣa, imiren kan, ineggez-ed weqcic s temrart ger ifassen; tiyta s arkkel ɣer yedmaren; iɣli weqjun; aqerru-yis iruḥ; nnefs deg-s yeqmeḍ; iddem-ed ibaren-as tiyerrist si temggarṭ s yiwen wemrar yettfuḥun d zbel; ikker ad t-izuɣer; aqjun yugi ad yekker si ger uɣebbar; allen-is brarḥent s igenni; ikkefta iwraɣen teffɣen-d seg imi-is am arṣeḍ. Iwala-t akken weqcic yuɣal d azzeggaɣ ula d netta; inna ger-as d yiman-is, nɣiɣ aqjun-iw. S tufɣa n leεqel irfed-it-id si teqqatt ɣef yedmaren-is; yewwi-t s axxam s imeṭṭawen d wexlul. Akken yewweḍ, issuɣ s wayen I s-ed-yegran n taɣect I yemma-s akken ad twali acu ig-uɣen aqjun-is; teffeɣ-ed yemma-s, twala aqjun qrib ad iwedda; yenna-yas “Iɣli weḥdes deg ubrid, ur ẓriɣ d acu I t-yuɣen; ahaqel yella I d-yečča s albaεḍ”. Tekkes-as-t-id tmeṭṭut si ger iffasen-is; tejgugel di temrart-nni I s-yettwaqen si sin yexfawen almi teqqerṣ; teddem-ed aman tessuddem-as-en ɣef yimi-s; tebda as teslufuy I yedmaren-is almi I d-yelli allen yeččuren, imiren d aman. Teḍṣa-yas, ur as-ed-iḍsa-yara. Rebεa wussan ur yečči-yara, rebεa wussan ur yeṭṭis-ara; iqqim di tlemmast n tnafa akk d tnekra; yettmekti-d tudert-is yiwet yiwet, as-tiniḍ am win ara-yemten; tuɣal tudert arẓaget ɣur-es, ittu lbena-s, ittu acali n tebḥirin ig-ḥemmel aṭas; di lewhi-yagi yuḍen tiɣimit di ccuka, deg yiwet n teḍwiqt anda ḥed ur t-id-yettami, ur t-id-yesteqsay. Ixxemem ixxemem yufa ur yezmir-ara ad yedder di taddart –nni I dgi tedder teqjunt I d-yewwin yes lwaqt; u yeẓra anda ma yedda anyaf Finat nniḍen ad d-yawin ugar n tmezwarut. Di tegnitt n tafat daxel n wallaɣ-is ikker iẓdem di lḥiḍ; yerra-t-id s lǧehd I s-yessufgen azgen seg-anzaren-is, tiṭ-is tazelmaṭ tejreḥ teṭṭerḍeq d idamen; akken t-id-tufa yemma-s n weqcic yeẓẓel d idim di lḥara terfed-it s axxam texdem-as ddwa I leǧruḥ-is; tekker tessaɣ-as times mi tebda tawla, akk teddem-ed teḥma-yas ayefki tessexleḍ d weɣrum tesseč-as-ten s uḥettem. Ula d aqcic, mi i-d-iwweḍ si lakul, ma akken t-id yufa yenejreḍ wudem-is akken, iddem-ed ixdem-as taxxamt daxel n texxamt-is s leḥwayeǧ tiqdimin anda I s-tekkes cwiṭeḥ si tawla. yuɣal seg aṭan ɣer wayeḍ, ikcem di yiwet n targit anda yexleḍ useglef n Finat akk d titiwin n weqcic ar yedmaren; ittu anwa I t-yewten ma yella d taqjunt-nni yuɣen tanumi tettazal yides ger ixidwac neɣ d aqcic-nni I t-yeṭṭeggiṛen si innijel. Tikwal as-ed iban weqcic yelufuy-as si tmelɣiɣt, tikwal d tqjunt-nni m ttnefxa I s-ed yettakken iɣsan i wimi mazal yekkes uksum; izzer deg uxxemem ɣef acḥal yeqqim di texxamt; acu kan ur yeẓri-yara anta taxxamt, ma tin yebnen s lluḥ yerkan neɣ tin akken anda tettwaεelleq ttwiṛa n yiwen umyurar n ddabax. Ɣur-es tiẓeṭ n temrart I t-yesmeṛjiḥen ger ukkessar d usawen tcuba ɣer tṛaṭiwt n tɣawsa-nni tucbiḥt yeṭṭafaṛ di lexlawi. Εeddan wussan, yeḥla; am akken neẓṛa yark belli iqjan dima ḥellun, am yemcac! Ula d at wexxam wehmen deg uqjun-nsen; ibeddel ssira akk d tikli; yuɣal iḥemmel ad yeffeɣ netta d weqcic; ula d aqcic yuɣal ittḥadar fell-as; ur t-yekkat ur t-isnuɣnuy; uɣalen myufan am sin innuɣen ɣef ulac, wa yettaεraḍ ad d-ibeggen i wayeḍ belli ayen iεeddan iεedda am yir tabuciḍant deg ussan n tefsut taberkant; ih tabarkant a widak ittun idamen. Yernu ma yili weqcic deg uɣerbaz ad yekker weqjun qbala ɣer lexla anda yettnadi ɣef igedfan(agdef=re²baire du lieḍre) n iwetlan. Seg umruj ɣer wayeḍ, netta am lexyal ur nettembbiwil yettεassa mara d-isḍil uwtul taqerruct-is, ad iɣewwer fell-as s yiwet n tiyta n wuglan. Mebla ma yesxarbaqit, tameddit, ad t-id-yawi s axxam ger tuɣmas-is i tmeṭṭut-nni t-isseḥlan; nettat, imi ur yemzil-ara, ad tessebw, umbaεd as-t-is-tefk tiḥricin yal mara yečč. Yuɣal weqjun, tugti n wakud-is, isεedday-it di ṣyada d anadi ɣef uccanen akk d yefrax. Mi ig –mraq yiwen seg uccanen ad yebdu aḍfar-is ger iɣeẓṛawen alma yesseεyat; ma iεedda wuccen si teḍwiqt ger ixidwec a n-yaf aqjun a t-yettraǧu si tama-nniḍen; ma yuli tiɣilt, aqjun a t-yezwir ɣer tqacuct. Taggara mi t-yeṭṭef ad yurar yess am tesɣart alma yeεya. Din as-yessentu tuɣmas-is deg iẓuran n temggaṛṭ-is am ukkelab ameqṛan ma yeẓmeḍ amesmaṛ amectuḥ. Uccen yettissixen yettmuqul ɣer teqqatt akk d igenni s nuba ujeεlulaq n tqerruct-is i tetteffeɣ tudert. Aqjun yuɣal ar tin n at zik-is, tuɣal-as tudert akk tmettant d urar n wussan-is iḥerfiyen. Yewwas, ma akken ur yerǧa-yara, ma akken ifka tameẓẓuɣt i lhafa yesla, yettraǧu lefrisa ara-yeɣḍel, neggzen-d sin yeqjan fell-as mebla ma iffaq. llan wanzaren-is lhan-ed d rriḥa-nniḍen,ur yerǧa-yara tiyda n leɣdeṛ; negzen-d fell-as seg yiwet n tiɣilt, anda llan xemten; ur iwa-yara amek ara-yerr ɣef yiman-is ; hemjen-d deg-s wayen sεan n lǧahd, ur as-ǧǧan-ara amek ara-yezzi ɣef yiman-is. Wa iṭṭef-it-id si temgaṛṭ, wayeḍ si tṛaṭiwt, bdan la hemjen deg-s am akken ihemmej ula d netta deg uccanen; ur-as -ǧǧan kra. Iɣli ɣer teqqatt, iglalez am ukerri n lεid mara yemzel di tlemmast n wannar. Iččur d ifeddixen i d-yeṭṭeggiren idamen mebla cceḥa. Uqbel ad yeṣra iwala-d udem azedgan bu nniya n Finat mi la tmeččeḥ idamen si ger tuɣmas-is akk d tcenfurin-is n ddheb. isla-yas mi da s-ed ttbari ɣef acu i t-id-yewwin ɣer temnaṭ-nsen, nettat d Dik, yuɣalen tura d acrik-is deg imura n taddart. Iḍṣa weqjun ger-as d yiman-is, issers aqerru-yis deg akal assemaḍ am win yemmuten. Izri yiṭij, ur d-ikcim weqjun. Aqcic, i t-yettawin ger wexxam akk d beṛṛa, yettmuqul anda ara-yaf aqjun-is. Isteqsa yark medden ma yella win t-iwalan, neɣ ahat yedda d walbεḍ n lǧiran s anda n kra. Iḥdaqaṛ. Akken iwala iɣli-d ṭlam yebda yettru deg uxxam s ssuɣat am llufan , ittmeǧid s lqed ugarjum-is. Ulac amak ur as-xdimen-ara akken ad issusem yugi; yeqqaṛ-asen “ tura ara-yemmet weqjun-iw lemmer ur ttawaḍeɣ-ara ɣur-es, tura a kfun idamen seg-s”. imawlan-is, lǧiran-nsen zzin-as la ttebbiṛen deg-s, qqaren-as “tura ad d-yekcem, yuɣ tanumi ittɣimin di bara”. Netta yettara-yasen s imeṭṭawen belli tikelt-agi atan yeẓẓel deg albaεḍ imeḍqan la yessufuɣ rruḥ. Kkren wten-t cwiṭ akken ad yessusem, dɣa izzad deg umaṛmaɣ. Istaxla-ten irwel-ed seg uxxam qbala ɣer lexlawi I d-yezgan ddaw taddart. Yemma-s, bab-as, sin yergazen n lǧiran d kra n warrac mecṭuḥen ḍeffṛent di tazla-s d akkessar. Netta si tebṛiṭ ɣer tayeḍ d aneggez ger leẓrub d ixidwicen, yettnadi ɣef later n weqjun-is. Di tikli-ines yettaǧa tiḥedrin n leḥwayeǧ yelsa ɣef yiri-s ; ta di ẓẓeṛb, tayeḍ deg uqeccaḍ d-iffɣen am lmus. Ula d widak yettazzalen deffir-es uɣen-tent; wa iruḥ-as uṣebbaḍ, wa yejreḥ, wayeḍ yexbec. Ur uminen mi nufan deg yiwet n teɣẓert aqcic yeẓẓel ɣef tfekka n weqjun ineddren am win icelqafen di tizi n ṭlam. Weḥden di Rebbi amek yeẓra weqcic ig-uɣen aqjun. Terfed-it-id tmeṭṭut ɣef tedmarin-is, aqerru-yis yejaεluluq am nnaqus. Tikkelt-nni, ur tezmir-ara acu ara-s-texdem, imi tiyta meqqret. Ur tuffa amek ara-teḥbes anneggi idamen si mkul lǧiha si tteǧa-s. teddem-ed tessawel i yiwen uqcic yeqqaren ad d-yeffeɣ d amejjay ,mazal-as kra n wagguren ad yuɣal d amejjay. Tewwi-t-id s axxam tenna-yas: seḥlu-t ak-efk-aɣ ayen i k-yehwan. Aqcic-nni yellan yettru, iqim la yettecmumuḥ, iṭṭef taḥnact deg uxxam, ur as-ed-tewqiε-ara am akken yettkel. Iddem-ed umejjay i nɣant s leqder tiḥellilin n tmeṭṭut, iṣfeḍ-as-ed leǧruḥ i weqjun, ixaḍ-as yark, yiwen yiwen, iccerigen yesεa deg uksum-is. Aqjun yellan s tmuɣli n llufan, yettmuqul deg umejjay mi da yessekcam tisegnit deg-s am win yettmuqulen iman-is di tteswira. Segmakken meqqer weqraḥ i s-ed-ǧǧan icenga-ines yewweḍ ur yettḥalfu i wanuy n wuzzal aṣemmaḍ di tfekka-ines. Uqbel ad d-yeffeɣ umejjay seg uxxam umuḍin, iwwet-as snat n tsegnatin, tamezwarut n lǧahd deg umur idamen i s-iruḥen, ti snat i tguni. Weǧin teṭhella deg-s am tikkelt-nni, iwerra-yas-ed Rebbi am yiwen seg arraw-is. Tuɣ-ed ula d iɣsan seg ubucri, tessebw-yas-ten cwiṭ cwiṭ. Aqjun ur wwiḍen-ara sebεa wussan mi d-ikker ad yeffeɣ ; lemmer mačči d aqcic i t-yeqnen ɣer tama n lkanun akken ad yeḥmu tili atan yeffeɣ ɣer lexlawi. ɣas mazal cwami deg-s, nezmer ad d-nini belli yeḥla u balak yuɣal xir ɣef akken yella. Yuɣal yettazal am zik; ihemmel deg isenanen akk tsekra mebla yezzi-d ɣer deffir-es. Dɣa yesnulfa-d iteddu netta d imeksawen, ittεessa tijlibin-nsen ɣef ucanen. Ula d nutni uɣalen ḥemlen-t, ttakken-as ad yečč am yiwen seg-sen. Ma d aqcic, yellan yekkat-it mebla sseba, yuɣal yeḥdeq am uẓru n lǧama. Iteddu yid-es am umeddakkel iqebblen ayen d as-yehwan i weqjun. akken almi d ass i d-yemlal Dik, ileḥu weḥdes deg yiwet n tebṛiṭ yettawin s agudu n taddart . ixẓer-it-id Dik s ustehzi, ishewhew-as-ed belli lemmer a t-id-yemlil ass-nniḍen zdat-es ad –as yernu ayen i –s-ed-yeǧǧa. Netta ur yeṭṭif iman-is; acu kan ur yebɣI ad yesnuɣnu Finat, imi tuɣal tecrek nettat d umehgar-agi ur nesεi sser. Yernu netta d aqjun Iɣucen amennuɣ ger sin yexfawen n yiwet n twacult. Iẓra iman-nsen d arraw n yiḍan d tiḍanin. ɣef aya ur ilaq ad myeččen ger-asen imi amennuɣ ur d-yettawi kra , ḥala taεdawt ur nessufuɣ. Netta isemḥen ayen ur yezmir aẓru ad isemmeḥ amek tebɣiḍ ad yemmekti tiyta n wuglan uṭaṛus ur nessin anta tamurt I d-yekka, ma d libya neɣ d ṭelyan. Iwwet abrid iεedda. Dik yettwehim deg-s, yelli taṭṭucin-is tizegzawin; netta yuggaden ass-nni i deg-i a t-id-yemlil ɣas ma yeẓra yugar-it tafekka. Ibra weqjun wallen-is zdat-es, yessader tanzarin ɣer wakal. Ma akken iwala Dik anecten zdat-es yenna ger-as d yiman-is“ as-ksaɣ ass-a taẓana ad thenniɣ i lebda“. Yuzzel deffir-es almi I t-yeqḍa, yesseglef-as tiɣri umecčew. Yezzi-d ɣur-es, yenna-yas “ ugad as-tini Finat ḥeqraɣ-k mi ulac-itt”. Izεef Dik, iɣewweṛ-ed fell-as am alɣum. Aqjun-nneɣ, akken yuɣ tanumi ixxeddem-asen I wuccanen, acu kan wagi meqqer cwiya fell-asen, immeɣ-as ɣer wemgarḍ. Qbel ad iẓẓer acu I t-yuɣen iẓẓuɣer-it d akessar deg yiwen uḥecraruf. Isseḥnunef-it ger yeẓra uṣeffay. Akken t-iwa di teqqatt, Iɣeẓẓa-yas tameẓuɣt-is almi la yettisix i Rebbi I t-id yefkan ɣer tmurt anda ulac ijdi.issereḥ-as weqjun I Dik, yenna-yas” lemmer mačči d Finat I yugad-aɣ as-tini di dra-s ikkewteɣ tili wellah ma tmecḥeḍtt ass-agi tiqejjaṛin-is, aya fissa”.ikker Dik izwi iman-is, yuli ɣer tiɣilt, isseglef-as-ed belli ad yenddem fell-as. Imuqel-it yeḍṣa.yenna-yas ih,ih. Iruḥ-ed Dik, s ifeddixen-is, qbala ɣer Finat. Yenna-yas belli aqjun, yellan zaεma d ameddakkul-is, yezzi-yas netta d kra n yiḍan-nniḍen. Tmuqel-it-id s yir tiṭ akk tzelleg-as-ed imi-s. tceggeε-it ad inadi anda yessired idamen-is imi yettfuḥu am tweṭṭuft immuten. Tessegra-yas-ed belli winna d cɣel-is. Dik, yesḥarejdilen, yebda la yettgala s iciwi-s mi akken I d-tezher fell-as teqjunt-nni teṭṭef yiwet n tcalawt imi teẓra-t d bu tkerkas; d lmuḥal ad d-yawi weqjun-is aqdim win ara-t-iεewnen deg imennuɣen-is ɣas ad yili Rebbi tin ara-t-yawin. Terfed taqejart-is tayeffust ɣer tanzain-is,tenṭeq ɣer teswira n warfiq-is aqdim,yellan imiren deg allaɣ-is: hatta deg-k, ak-tt-id-arraɣ. Uzlan wussan, uzlen yid-sen wuḍan. Aqjun yettkkemil di syada akk d tdukkli d win yufa. Tikwal hatan netta d weqcic d tawaldyawt, tikwal netta d wemɣar n wexxam d aḥeweṣ, tiyaḍ weḥdes neɣ netta d imeksawen ɣer tama n teqḍayin n izamaren. Yewwas, diɣen (ugint ad kfunt fell-as), deg tezniqt n yemcac imlal-ed ugar n εecra yeqjan, seg widak yessen di taddart, la tettraǧun akken as-zzin. Akken iwala ayen I d-qeṣden mačči d lxir neɣ d leḥlawat, iẓḍem ger-asen am tarṣaṣt qbala s axxam. Tuɣal ass-nni tezniqt n yemcac teččur d iqjan. Wa deffir wayeḍ deffir weqjun aggeswaḥ. Bɣan yark a t-ɣeẓẓen.iwweḍ ar tsemit n wexxam iḥbes din din, ḥebsen ula d nitni. Ibɣa ad iẓer acu i d ssebba. Yiwen ur as-ed-yerra. Seg ass-nni ibeddel tanumi di tikli-ines. Yal mara yeεreḍ ad d-yeffeɣ ad d –yaf ugar n tlata yeqjan la tettṛaǧun deg albεḍ n ccukkat. Imiren kan ad yezzi s axxam; ur yezmir-ara ad yennaɣ anecten. Diɣen yaεreḍ ad yefhem acu d ssebba, imi yeẓra akken d as-yehwa yerna-ten Dik ur yezmir ad yessiweḍ s anecten n tεessast ɣef yiwen weqjun ur neḥmil ad yennaɣ; ulac anwa I s-yettalasen di taddart marra. Tikwal teṭṭfen-t kra, umbaεd sin ihemmijen deg-s ad yessenser, ad inadi anda yeffer alamma mfaraqen; umbaεd axxam ad yemnaε bab-is. Ixxemem, imeyyez, yufa; yufa-yas tifrat I tejlbin n yeqjan. Yuɣal, deg umur n tεessast I s-xeddmen, yuɣal d netta i la ten-ittεessan, acu kan yiwen yiwen. Amezwaru yeṭṭef-it deg ugudu mi akken yettnadi deg iḍuman acu ara-yečč. Iḥeṛes-it ɣer yiwet n tiɣilt icabcaqen. Yenna-yas as-ed-yini ssebba I ɣef ttggalan iqjan n taddart fell-as, u d acu bɣan seg-s? aqjun-nni yettwaṭṭfen weḥdes yebda la yettirgigi, tiqejjarin-is myekcament am sselk, as-tiniḍ tura a qerṣent am lexyuḍ n cmiḍ.yugad ad as-yexdem akken ig-xdem I Dik, imekta-d leǧruḥ-nni ur neḥla nnig waggur,si tewwurt n remḍan armi d taggara-s. inna-yas a k-ed iniɣ ma yella ad iyi-tserḥeḍ ad ruḥeɣ. Winna yeqbel; wayeḍ yebda: truḥ-ed Finat ɣer-naɣ yiwen yiwen, tenna-yaɣ-ed ad nejmaε deg useqqif anda gganen waṛẓen d taggunin. Yakk teẓriḍ ulac anwa ig-zemren ad d-yini ala i Finat ma d-ssiwel i wnejmaε. Akken newweḍ s agraw useqqif, tezzaken-aɣ-ed ifeddixen n Dik I wimi I tezziḍ keč d yeqjan i d-tewwiḍ si taddart n at ufella(ih akka a leqmayel ufella, swadda, talemmast…). Wanecta ur tettafeḍ-ara mmi-s nteqjunt iṣṣeḥan a t-yeqbel. Umbaεd mi nesseglef almi neεya, tenna-yaɣ-ed a neddukkel fell-ak arma nessuffeɣ-ik si taddart neɣ ad tqebleḍ assaraḥ n yimani-ik seg albaεḍ n ṣḍuḥ. Yernu a k-ed-iniɣ ṣṣaḥ umbaεd nesteqsa-d tuddar-nniḍen anwa I k-iεewnen, nufa ulac anwa. Ernu nfaq-as I Dik belli yeskiddib di thedduṛin-is imi yal mara nesteqsi d acu n tmacahutt ad d- yawi ɣef umennuɣ-nwen. Inṭeq weqjun-nneɣ ar ɣur-es: ihi ayɣer mazal I ken- teṭṭafarem-iyi. Yerra-yas-ed: llah ɣaleb ass-nni teḥrec Finat acku tefkka-yaɣ-ed nɣeẓẓa tabbewaṭ n ccema almi I tt-neẓḍa akken ur nḥebbes amennuɣ yid-ek alma txeḍmeḍ ayen neggul, u anecta teẓriṭ, ɣer yeqjan aɣẓaẓ n wuzzal icba ddin, ur nezmir-ara a nuɣal ɣer deffir ɣas ma neẓra di lbaṭel.imuqqel-it weqjun s leḥqara, iεeggen-as ur t-id ittemlili-yara ass-nniḍen zdat-es, ma ulac ad yili seg imezwura ad d-yawi lqeḍ-is. Inna weqjun ger –-as d yiman-is: d Finat waḥlil ! yuɣal d lmuḥal ad t-id temlileḍ di taddart ileḥḥu weḥdes. Ma ur d-yeffiɣ netta d weqcic ad d-yeffeɣ netta d wemɣar. iqjan n taddart bdan la tteεyun di tεessast-is, serḥen cwiṭ imi yal yiwen deg-sen isεa cɣel-is. Uɣalen d tiswiεin kan i tettraǧun, u bḍan d tirebbuya, yal tarbat di lawan-is wala di temnaṭ-is. Finat, diɣen si tamas, tẓar-iten, u tettgala deg-sen ɣef win ara-yettun uzal iɣeẓẓan, ma ulac d nettat s yiman-is, ma akken di talwit n tnafa-nsen, ad teddem tarwiḥt nsen am tafat-nni ileḥḥun di taddart yal mara yemmet yiwen. Imi iqjan ttwalin, uqbel at taddart ad rren yiwen deg-sen ddaw wakal, yiwet n tafat yettazalen ger yexxamen tettnadi ɣef tewwura, tettḥesis ɣer leḥyuḍ. Iqjan icarafen faqen belli yal mara walin ifeṭṭiwjen-nni kecmen s albaεd n yexxamen, azzeka-nni ad awin yiwen seg-sen ad fren daxel n wakal. Llan kra n yeqjan, iḥemlen imawlan-nsen, sseglafen aṭas yal mara ẓren tafat-nni ɣer at wexxam-nni I d-teddun. Acu kan, akken heddren yeqjan ger-asen, imdanen am yemcac ur da fehmen ula d iweṭ. Idder wegdi-nneɣ d amaεzul, ur yettamen yiwen seg arraw n ṭṭajiṛa-s. acḥal d abrid i tessasxen di taswiεt ur yebna-yara; irreggel-asen-d s kra ijjerṛiḍen di tteǧa-s. Yewwas, ma akken ur d-teggra ula d rriḥa n ṣbeṛ deg ul-is, imeyyez acu ig-zmer ad yexdem i yeqjan yeggulen ad dduklen ɣef ẓẓuṛ akk d tmeḥqranit. Ikfa-tt d yiman-is. D nitni neɣ d netta. Yiwen ig-ttawin trad ;ma yerbeḥ yiwen wayeḍ ad yexṣer. Tameddit-nni ger yeqjan n taddart ifren-ed win iweεren ger-asen, yurǧa-t deg yiwet n teḍwiqt yettawin s axxam-is. Akken iruḥ ad yekcem isawel-as s yisem-is. Winna yezzi-d ar ɣur-es, yefqa. Mmesmuqalen. Mebla awal wa yeẓḍem ɣef wayeḍ. Bdan aglilez di teqqatt am sin warrac mara tturaren. Uɣalen am tcirett n ddabax mi yetteεraḍ yal yiwen deg-sen ad d-yeṭṭef wayeḍ si temgaṛṭ. Yaεreḍ weqjun-nneɣ ad as-tt-id-iḥaz, ur yezmir-ara. Dɣa yemmeɣ-as ar tzaggurt-is anda yessenta uglan-is almi d tiqarniyin. Yussax weqjun-nniḍen,issereḥ i yiman-is ma akken iḥulfa I weqraḥ deg ugsum-is. Aqraḥ igan am tubya n trisiti yettfeggiḍen deg iẓuran n wul-is. Iḍlaq i yiman-is deg uɣebbar yekkren. Imiren yebda a yettkaεwiw am ucen tečča taṛṣaṣt. Yettmuqul s leḥnana deg allen-is allen yerɣan n weqjun yugin ad issereḥ di tuṭṭfa. Iḥellel-it s uyefki n yemma-s ur yeṭṭiḍ-ara ad as-issuref tikkelt-agi. Yettgala-yas-ed, imeṭṭi ɣef tanzarin-is, belli ur yettuɣal-ara ad d-ilhu yid-es ɣas ad yeḥnet i lemgallat wuzzal yeffeẓ netta d yeqjan n taddart. Ma yebɣa ad yamen ayen akka i s-ed-yeqqar, ad as-issereḥ imiren, ad iruḥ ad d-iḍegger iman-is si sqef I d as-yehwan netta deg umur-is. ma yebɣa ad as-issemeḥ, ad iruḥ din din , ad yali ɣef uqermud n lǧama n taddart, wa ad d-iḍegger s yin iman-is. Issereḥ-as wegdi-nneɣ.imuqel-it urt-yumin-ara imi ineẓden n weqjun ittewten la ttembbiwilen seg ubeḥri, ur qqurit-ara. ɣur-es iban la yeskibid, u rriḥa n ttar la d-tettfuru seg-s. di tunḍa taneggarut, ineggez fell-as. Iḥuza-t-id seg uẓar n tgarjujt-is yettawin idamen. Ičxed tuɣmas-is deg aẓrem idamen. Yeqqim akken iẓzemiḍ deg-s almi ikfan idamen seg-s. Yerra-d nnehta taneggarut issereḥ-as. Ass-nni, iqjan n taddart marra iwweḍ-iten lexbar ɣef tedyant-nni n lmut n ccif-nsen. Yal yiwen amek i d-yewwi tamacahutt-is, imi ur tesεiḍ anwa iḥeḍren din. Tawaɣit, slan yark yess at iselfan. Yebda umeǧǧed s useglef akk d ushewhew; ladɣa tiqjatin-nni d wimi yaεdel win yemmuten, acku aṭas n lxir I sent-yexdem; ta yefka-yas ayaẓiḍ, ta inḥel-ed fell-as deg umennuɣ, ta yejma-yas-ed argaz-is seg icalan. Ulac tin i wimi ur yexdim-ara lxir. Yal yiwet amek I s-yexdem lxir. Ula d iqjan ḥemmlen-t. aṭas n tɣawsiwin icarken akken-nni. Akken yettwanṭel weqjun deg yiwet n tesraft i s-ibudd bab-is-nni i wimi qqaren aɣyul <<at amar>> imi ur yefhim ur yexṣim, llah ɣaleb d aɣyul. Iẓẓuɣer-it ihi <<Ucmit>> aɣyul ɣer yiwen weḥriq yesεan acruf, iḍeggeṛ-it ar din mebla ma yerra-yas akal; ittu lxir yark i s-yexdem; nniɣ-awend d aɣyul,ula d lɣaci ur s-ǧǧan-ara s yisem-agi. Akken qqaren d isem-is i d awal-is. Mačči d tikkelt-agi ara-yerr aḍar. Iqjan yeddan yid-es zzin fell-as ččan-t. ssufɣen-as laεqel ɣas ur t-yesεi-yara. Dɣa seg imiren tzad tagdi deg iqjan akken izzad uɣucu n win yenɣan yiwen ger-asen. Tuɣal temsalt mačči d tin umennuɣ, tuɣal d lmut akk d leqtila. Ass-nni, mi akken mazal-iten dduklen, nudan lxayen anda ara-t-afen. Ttin taddart seg uqerru ɣer tifednin ; ulac taḥnact ur wwiḍen-ara, ulac tabarda yeqqerṣen ur suman-ara, ulac tanqeltt ur hucen-ara ; ruḥen ɣer tsirt, ɣer lǧama, s agudu, ulac yir tuffirt ur llin-ara. εyan uɣalen-d ɣer tewwurt wexxam yezdeɣ weqjun-nneɣ amcum. Akken sin wussan i la tettεessan ur teṭṭifen-ara. Deg ass wis tlata mi akken gan tameɣra s useglef zdat wexxam-nsen, netta yufa-t-id lḥal deg umnar n yiwen n weqjun-nniḍen. Yufa-t-in la t-ittraǧu. Yenna-yas : d keč i la ijebden iles-is am lastik, teqqareḍ-as weḥdi a t-nɣaɣ. ihi aqli zdat-ek, haw haw haw a yaɣ čči-yi. ili-k d aqjun bu tissas yekkaten uzal deg ussawen. Yerra-yas-ed winna : ih d nek, ɣuri keč d win yerẓan leqwanen iqburen n yiḍan ; tenɣiḍ aqjun ɣef tewwurt n wexxam-is ; ɣef aya ilaq ad temteḍ. Yerra-yas weqjun-nneɣ : d kenwi i d-yezwaren s amennuɣ ; ikkellex-awen uṭarus aberrani, teddam deg umecčew i ken-yexḍan.yerra-yas-ed weqjun yettwaṭṭfen : teẓriḍ iqjan am leqbayel, tettun ula d nutni ; lemmer teṣbireḍ cwiṭ tili a nettu neɣ a nestaεmel nettu. Aman ad uɣalen s acabcaq mebla ma nneɣlen. Maca keč ,ur teqbileḍ-ara ula ad d-tḍeggreḍ iman-ik si sqef n wexxam akken a k-nsemmeḥ. Tekcem-ik twekka n ttar seg anzaren. ɣas ẓriɣ terniḍ-iyi, a k-t-id-iniɣ qbala ayen yellan deg ul-iw. ilaq a temteḍ ! yernu tura lemmer i d ak- zemreɣ.yerra-yas-es weqjun-nneɣ: ihi tura d keč neɣ d nek. Wa ineggez ɣef wayeḍ. Mṣekṣakent tuɣmas deg igenni bu tεeqqucin, am sin lelwaḥ n tewwurt yettewten s terẓeg n ddemaṛ, sin yeqjan deg tizi n temẓi myeẓmaḍen di lḥif abarkan. Yal yiwen deg-sen yetteεraḍ ad iwa wayeḍ, a t-yeṭṭef seg umgarḍ. ẓẓran di sin belli d amḍiq-nni n tfekka i yezzizilen tarwiḥt-nsen, yal wa yettmuqul amek ara-tuɣal d ayla-s. Mxeẓwaḍen, mfedaxen. Aɣebbaṛ ikcem anzaren-nsen yellan ttfurun am tugi n seksu. Lǧahd ibda la yettader, ineqqes si tqqejjiṛin-nsen iceṭḥen am iẓḍan s wacu itelmen taḍuṭ. ittkatt wexbac d udeqqem. iban din belli win ara-yeεun d winna ara-yanfen i tedmarin-is ad ḥnunfent deg akal. Ulac leslak tikkelt-agi. Amcum d win ara-yeǧǧen allaɣ-is ad iseweq; deg-umecwaṛ ad d-yaf iman-is deg-ucwari n lmut. iban d amenuɣ aneggaru i yiwen seg-sen. Wa yekkat wayeḍ s anda iwa, ulac aḥebbaṛ-nni sεan yeqjan, imi aḥebbaṛ yettili deg umecčew-nni n uqisi n lǧehd akk d tezmert. Tikkelt –agi d tin n wwet ad wteɣ, ɣeẓẓ ad ɣeẓẓaɣ, neɣ ad nɣaɣ.akken- nni teɣẓi n yiḍ ur fukken-ara. Ula d imezdaɣ n taddart acḥal d yiwen i d-iḍalen ad iwali d acu-t umennuɣ-agi isseḥraṭwen tasusmi n yiḍ. Mi d-walan ad uɣalen; qqaren-as d iqjan, awar d-uɣalen, ǧǧi-ten ad msekkfun. Sin-nni yettun ula d amḍiq anda llan, zren deg yiwet n tegmatt taṣemaṭ; wa yettḥalfu i wesṭenṭen n wul n wayeḍ di ger-yark ssuɣat yellan zzint-asen-d. Tin i d tikkelt tamenzut i sin i deg- ara-yawḍen ɣer tqacuct-nni n lwaḥc iɣummen s tecḍaṭ-is tabarkant tiẓeṭ useglef s aggur deg ussan n tziri. Uɣalen idamen am aman ugeffur, ttazzalen ɣef leǧwareḥ-nsen. As t-iniḍ d iyeddiden n sbiɣa tazzeggaɣt i tesɣarṣeḍ di tezniqt-nni, iwimi ssawalen yeqjan ṭebbegriri. Aqjun-nneɣ yellan yettkel ɣef akken ad yeɣleb aqjun-nni nniḍen, yuɣal yebda yettayes zdat wezbu d waffud yesεa. ɣas yeẓra d netta ara-t-inɣen, imi d netta i d bu lḥaq, yergagi di tneffuṭ-is. Icukk di tezmert-is zdat wegdi yella yeɣleb; yerra-d ɣef yiman-is imi yezṛa d tin i taggara-s ma ur yerra-yara ɣef yiman-is. Iḥulfa weqjun-nneɣ i lǧehd-is mi d as-ittruḥu am agu ma ifetti s tsusmi n tafukt. Dɣa, imiren qbel ad yeɣli si εeggu, ur iban ma si zzahr-is, yebbanṭaḥ weqjun-nniḍen. Mebla ameyyez, iḥuref ɣelluy-is, yeɣli fell-as s wayen i s-ed-igran n lkuraj di tɣecɣuct-is. Aqjun-nniḍen, am win yeddreɣlen, ibda ihemmej deg ayen yufa; ttruḥunt titiwin-is deg ubeḥri aḥarfi. Ma d aqjun-nneɣ issekcem tamgaṛṭ n wayeḍ ger Iɣeṣmaren-is, iẓmeḍ-iten am dkir akk d wuzzal. Yeqqim akken yettḥaṛis deg-sen as-tiniḍ yebɣa ad neṭḍen nutni d weksum n wayeḍnin. Ageswaḥ, di tmuɣli taneggarut ɣer wexxam i deg-i i d-yekker, issufeɣ ṛṛuḥ. Iqjan, lɣaci wehmen deg anecten idamen yeneɣlen deg ubrid n “ṭebbegriri”. amek iga umecčew-nni. Iban mačči d tin akken uqeṣṣar. Ladɣa mi yufan taffeka n weqjun; izzuɣeṛ-it win t-inɣan ɣer tlemmast useqqif n taggunin. Yeẓẓel din am uyaziḍ yessexnunes ugeffur azeggaɣ, tteǧǧa-s texenzer, ulac i d-yegran deg-s ur yefla-yara am tseksutt; Taceṭṭiṭ-is teqqerṣ am uɣarbal imcaṛcaṛ. Win i d-yebbḍen s amḍiq ubaxix, d amdan neɣ d aqjun, ad iweḥed di rebbi,as-yini d ass n taggara. Ladɣa iqjan ikcem-iten lxuf, ugaden yark ad d-yezzi fell-asen uqjun inecfen. Acku ttkan yark di tdukkli fell-as mi akken i d-gren fell-as lbaṭel. Akken iwala akken weqjun acaraf, ameqqran n widak ur nesraḥay-ara imcac, ikker isnejma-ed yark iḍan n taddart, anda tella Finat, ɣer yiwen wemḍiq i wimi ssawalen targa n yebẓaẓ. Netta iṭaxer-en si tsartit; ixdem-asend yiwen usarag ɣef tdukli akk d smaḥ ger watmaten; iḥka-yasen-d ɣef imennuɣen iεeddan ger at ufella akk d at wadda. Issefhem-ed i wegra-w n tarwa iselfan belli di lecɣal imeqqranen am widak iḍeṛṛun imiren di taddart, yettuɣal lqanun aqbuṛ ur ileḥḥu-yara. ɣef aya ilaq ad d-afen tifra i daεwessu d-iɣlin fell-asen. Yekfa usarag; mcawaren yeqjan as-aɣen awal. Yessawel-as-ed i finat akken as-yehḍer. Ihḍer-as; tesla-yas-ed. Mfraqen. Tameddit-nni tessawel-as Finat i weqjun-nneɣ s yiwen useglef ur yezmir yiwen ad yettu ma yesla-yas. Taɣect n imeṭṭi azuran di txaraǧit iḥarṣen. iffeɣ-ed weqcic seg uxxam, ajelkaḍ ger ifassen-is; ibda iẓẓebbeṛ di teqjunt, nettat la treggel. Tugi a truḥ, tkemmel deg useglef-is igan am anza. Aqcic yettuɣu fell-as “ ruḥ a truḥeḍ a lǧifa aεni drus i s-txedmeḍ. iban ur tetteḍḥiḍ-ara a yelli-s uṭaṛus; aya εeffeṭ”. iqjan marra qqimen-d agemmaḍ, ttmuqulen-d ɣer Finat mi la tettfanti i titiwin n weqcic. Iffeɣ-ed weqjun seg uxxam, ifeddex yark, iḍaren-is ttemdekwalen si lexsaṣ n lǧahd deg-iẓuran-nsen. Akken t-iwala weqcic iḥbes tiyta, inejmaε s axxam am akken accema ur yelli. Iwweḍ-ed ar Finat yenna-yas: -terẓiḍ aqerru-nneɣ; ccekka teččiḍ aṛṛeẓ neɣ teččiḍ arduz! Myesmuqalen; tṣubb Finat allen-is; tenna-yas: -bɣiɣ a k-hedraɣ. Yerra-yas-ed -a lxir ncallah (ɣas neẓra iqjan mačči akka swaswa i la heddṛen, maca tasuqilt teččabi ɣer ta). -εewqaɣ ansi ara-bduɣ. Ugadeɣ a txemmeḍ ayen ur nella-yara. -ruḥ ; ur ttagad-ara. ḥala ayen i m-yehwan ara-fehmaɣ. ɣas ruḥ ! teẓẓel ɣer teqqatt, tcareq iḍaṛen-is n zdat , tekref widak n deffir. Terra taraṭiwt-is s ddaw taɣma-s am tin ara-ikecmen axxam-is. Aqcic yettaḍṣa, netta issened ɣer teɣmert n tewwurt. Izher-ed fell-as weqjun, yerna aṭṭerḍeq n taḍṣa. ikker iruḥ, yuɣal s axxam.issegra-d awal ”inal bu n teqjatin anda ma lant”. Tkkemel Finat deg awal-is: -txṣreḍ. Mačči akka i k-snaɣ. Tuɣalec d qebbaɣ leṛwaḥ, tenɣiḍ sin yeqjan, tḥeqreḍ wiyaḍ. Keč illan d ddwa n tament, a t-serseḍ ɣef lǧarḥ ad yeḥlu. Acu ig-ḍṛan yidek? Wehmaɣ. Ttnadiɣ deg-i ad waliɣ ahat ig-beddlen deg-k. immuqel-ed deg-s s wallen yebṛarḥen. illi imi-s s umejgar. - wellah a taqjunt n medden ar d kem i d ssebba. Lemmer ur d-iyi-tessasxem-ara, kem d wafniḍ-nni n Dik ur nessin ula anta i tamurt-is , ar tili acemma seg anecta ur d-iḍṛi. Tesrewtem annar i wimi ur tezmirem. -mačči d nek i d-iskaddben. iɣur-aɣ yark weqjun rriɣ am gma. Ǧaεleɣ-t d bu nniya. Netta ziɣ iɣleb tasraft anda neṭlen tikkerkas.

TULLIZT SƔUR MOHAMED ARAB AIT KACI

⇑ haut ⇑